JAMII YAASWA KUONDOA FIKRA POTOFU KWENYE UGONJWA WA KIPINDUPINDU.

Kipindupindu ni ugonjwa hatari unaosababishwa na bakteria aitwaye ''vibriocholerae'' (kwenye picha hapo juu) na huathiri hasa utumbo mwembamba.Bakteria hao husababisha kuhara na kutapika sana pamoja na homa kali.

Na George Mwigulu KTPC,Katavi.

Wakazi wa mkoa wa Katavi wametakiwa kuachana na fikra potofu kuwa ugonjwa wa kipindupindu husababishwa na kulogwa yaani imani za kishirikina.

Hii ni kutokana na kuwa jamii mkoani humo hasa ya vijijini inayokaliwa na wakulima na wafungaji kujihusisha katika kulipiza visasi na kusababisha vifo baada ya kwenda kwa waganga wa kienyeji kupiga ramli ambazo ni choganishi wanapokuwa wagonjwa wakidhania huenda wamelengwa.

Rai hiyo imetolewa jana na mratibu wa kukabiliana na magonjwa ya mlipuko wa Hosptali teuli ya rufaa ya Mkoa wa Katavi Dkt Taphinez Machibya alipokuwa akizungumza na Gazeti la Majira ofisini kwake,ambapo alisema jamii isipotambua maana ya ugonjwa wa kipindupindu,chanzo chake,dalili zake,athari pamoja na kushindwa kuchukua hatua ya kudhibiti ugonjwa huo wataagamia.

Uharibifu wa mazingira unasababishwa na mafuriko ya mvua yaweza kuwa chanzo wa magonjwa ya mlipuko kama vile ugonjwa wa Kipindupindu,ambapi jamii inapaswa kuchua tahadhari ya kujikinga zaidi.

Dkt Machibya alisema kuwa ugonjwa wa kipindupindu kitaalumu unaoitwa Cholera husababishwa na aina ya bakteria aina ya Vibrio cholerae ambao wapo kwenye mazingira ambapo wanapoingia kwenye mwili wa binadamu hukaa kwenye mfumo wa chakula(utumbo)na huleta athari kubwa.

Alifafanua kuwa mabaki ya matapishi au kinyesi yanayobaki na kuguswa na mtu mwingine pengine yakachukuliwa na nzi kutoka eneo moja hadi jingine hasa kwa kugusa vyombo vya maji/chakula,chakula chenyewe au mtu mwenyewe akagusa mgonjwa atakuwa kwenye hatari kubwa ya kuambukizwa.

Aliweka wazi kuwa ugonjwa wa kipindupindu unaweza kutokea ni msimu wa kutupwa takataka hovyo,kuiva magunda mengi pamoja na kujisaidia nje ya mashimo ya vyoo hasa kwenye mikusanyiko ya watu wengi.Hivyo aliwataka wananchi kujenga vyoo na kuvitumia kwa usahihi.

Dkt Majibya aliwaambia wananchi kuwa pindi wanatakapo kuwa wanaona dalili za homa,kutapika,uchovu na kuharisha majimaji ya rangi inayofanana na maji yaliyooshewa mchele inawapasa kutoa taarifa kwenye vituo vya afya ili hatua ziweze kuchukuliwa.

Aidha jamii inapaswa kutambua kuwa athari zinazoweza kutokea ni pamoja na kuwa na vifo kutokea kwa wingi ndani ya muda mfupi na kupoteza taifa rasilimali watu,familia kuwa na mzingo wa kuelea watoto yatima waliofiwa na wazazi wao.

Athali nyingine mratibu huyo alisema ni upotevu wa rasilimali fedha kwa sababu ugonjwa ambao unahitaji mapambano makali ndani ya muda mfupi,kwahiyo jamii na serikali kutumia bajeti kubwa ili kuzuia kasi ya maabukizi.

Hivyo aliwaasa jamii kwa ujumla kuzingatia kufanya usafi kwenye makazi yao pamoja na kuhifadhi vizuri taka mwili hasa taka zitokanazo na choo na kunawa mikono kwa maji safi na salama na wala sio kuwa na dhana potofu za imani za kishirikina.

Utumiaji wa maji yasiyochemshwa husababisha ugonjwa wa kipindupindu,hivyo jamii inapaswa kuchesha maji au kuyatibu  kabla ya matumizi ya kunywa.

Nao baadhi  ya wananchi wa mkoa huo Alex Mwandu mkazi wa mtaa wa Nsemlwa alisema serikali inapaswa kutoa zaidi elimu ya magonjwa ya mlipoko.

Mwandu aliongeza kuwa elima kama itatolewa kwenye jamii hasa ya vijijini itasaidia watu kuchukua tahadhari za mapema za kujilinda ikiwa pamoja na kuachana na imani potofu za kuhusu magonjwa.

Aisha Hassain Mkazi wa mtaa wa Misukumilo manispaa ya Mpanda mkoani humo alisema kuwa uwepo wa ongezeko la vituo vya afya na zahanati vijijini itasaidia kutokomeza magonjwa ya mlipuko kwenye jamii.

Alisema kuwa zahanati pamoja na vituo hivyo vya afya kutokana na kuwa na wataalamu wa afya vimewasaidi wananchi hata pale wanapokuwa wagonjwa kupata matibabu sitahiki na kuyatokomeza magonjwa hayo.