Na Daniel Kimario, Afisa Habari Jeshi la Polisi Mkoa wa Katavi.
Katika kuelekea kilele cha siku 16 za kupinga ukatili Mtandao
wa Polisi Wanawake Mkoa wa Katavi kwa kushirikiana na Dawati la jinsia na
watoto wametoa msaada wa vitu mbalimbali kwa wagonjwa waliopo katika Hospitali
ya Wilaya ya Tanganyika Mkoa wa Katavi.
Akikabidhi msaada huo Desemba 8, 2024 Kamanda wa Polisi Mkoa
wa Katavi Kamishna Msaidizi Mwandamizi wa Polisi (SACP) Kaster Ngonyani
amebainisha kuwa Jeshi la Polisi Mkoa wa Katavi limeona ni vyema kufanya
matendo ya huruma kwa wagonjwa hao ili wasijione wapweke, ambapo ameendekea
kueleza kuwa Jeshi hilo linaendelea kutoa elimu ya kupinga vitendo vya ukatili
kwa kushirikiana na wadau mbalimbali.
Msaada uliotolewa kwa wagonjwa hao ni pamoja na taulo za kina
mama, pempasi, sabuni, sukari, unga, mafuta ya kupaka, miswaki na dawa za meno.
Akipokea msaada huo Mganga Mfawidhi Hospitali ya
Wilaya ya Tanganyika Dr. Daniel Mwansembo amelishukuru Jeshi la Polisi kwa
msaada huo na kutoa wito kwa jamii kuwa na moyo wa kusaidia wahitaji.
.JPG)
.PNG)
